政情:中風年輕化 黃思鴻都中招

無論係咩年紀,健康幾時都係最重要。工聯會尋日搞咗場心房顫動民間篩查大行動,喺青衣幫長者做檢查,以預防中風。以前喺工聯會做暑期實習嘅兩朵小花,現為工聯會社區幹事黃思鴻、陳安妮都有出席,黃思鴻話健康真係好重要,事關佢十八歲讀緊高中嘅時候都中過風喎!

中醫話邪風入體

黃話當時半邊臉癱咗,郁唔到,雖然中風情況唔係好嚴重,但諗番都覺得驚。之後佢先睇西醫做物理治療,後改為睇中醫,前前後後都醫咗成半個月。至於中風原因,佢話當時天氣凍,中醫師話佢冇好好保暖,導致「邪風入體」,所以自此大風嘅時候佢就要戴口罩,同埋定期做身體檢查。

陳安妮雖然冇類似經歷,但佢同黃一齊服務緊嘅大窩口比較多長者,所以健康議題都要跟得貼。佢自己每個星期都會跑步,不過就冇同黃一齊跑喇,事關黃鍾意競走多啲喎!

第一手消息請下載on.cc東網iPhone/iPad/Android/Windows Phone Apps