政情:九西補選 建制派未傾掂數

盛傳獲建制派篤定出戰十一月立法會九龍西選區補選的食物及衞生局前局長政治助理陳凱欣,尋晚喺Facebook開設個人專頁,雖然只上載咗兩幅個人照片同一段早前佢出席書展活動嘅短片,未有提及任何參選字句,但適逢尋日連有意出選嘅自由黨李梓敬都發聲明讓路畀佢,難免令人覺得新專頁係為之後參加補選鋪路。

李梓敬棄選 梁文廣未放棄

陳凱欣新專頁嘅兩幅照片,分別係一幅面露笑容嘅半身相,另一幅就係揸咪出席活動嘅照片。至於佢上載嘅約兩分半鐘短片,則稱自己最近忙於書展後嘅工作,又指短片係自己親自剪成,作為紀錄。而整個專頁都未見參選、選舉等字眼,係咪驚太早表態,要開始計選舉經費呢?

李梓敬尋日亦喺Facebook話自從食衞局前局長高永文表明唔參選後,唔少人支持佢參與,但建制派協調後,就有機會由陳代為參選。李讚陳有豐富嘅政治人脈,對政策同政治都有深入認識,不時同佢有工作上嘅交流,認為陳係值得支持嘅人選。佢仲話係大局面前,個人得失一啲都唔重要,最重要係建制派團結一致,攞番一席。

不過,經民聯嘅深水埗區議員梁文廣就未肯認輸喇!佢接受查詢時就話未收到建制派嘅協調結果,所以現階段仍會做好自己應做嘅工作。咁會唔會支持陳?佢就話要視乎協調結果,如果結果係經民聯出選當然好,但如果唔係,都會尊重機制,出全力支持咁話!咁睇嚟梁仲未放棄參選,想爭取到最後一刻。

第一手消息請下載on.cc東網iPhone/iPad/Android/Windows Phone Apps