政情：中產呻冇福利 要徐英偉找數
中產人士成日都話未能受惠於政府嘅福利措施。勞工及福利局副局長徐英偉（Caspar）尋日落區，去到天水圍嘉湖山莊同居民見面，但就變咗居民嘅出氣袋。居民唔止向佢遞請願信，仲話佢哋「稅款交到足，福利冇份享」，之後就開始向佢「追債」。有年輕夫婦就話要延長產假同侍產假，又要求增加社區幼兒中心同託管名額。咁多訴求，Caspar都唔知幾時先找到數喇。
承諾跟進先甩身
咪以為得年輕夫婦有訴求，有居民亦都提到，最低工資不斷調升，令管理費加價，要求當局調整最低工資時都要顧吓佢哋小業主負擔。亦有長者話，咁多年嚟不斷返工同交稅，臨老先捱到一層收租物業，但就冇得拎長者生活津貼，覺得唔公平同被懲罰，要求取消有關收入同資產限額，推動全民退休保障制度。就連元朗區議員李月民都話，想新一份施政報告會有多啲關注中產人士嘅福利。Caspar聽完一輪苦水，最後都要承諾會跟進居民訴求先至甩到身。