「懷緬過去常陶醉，一半樂事，一半令人流淚。」係呀，通過殺街之後，旺角行人專用區下月初就會成為歷史，所謂往事只能回味，好多市民同遊客趁住尋日最後一日開放，爭相嚟送別，係就係有啲傷感，但長痛不如短痛，點都好過要街坊耳膜無止境受罪吖。
唔經唔覺，旺角行人專用區已經存在咗十八個年頭，唔少市民都趁住最後機會緬懷一番，場面比往時更熱鬧。好似有喺專用區唱歌搵食嘅表演者專誠提早開檔，當正自己係大歌星搞告別演唱會咁款，雖然嘈到拆天，不過都最後一次咯，街坊同商戶都忍一忍，仲笑晒口話終於甩難添。
不過咁喎，旺角殺街話就話解決咗困擾多年嘅噪音問題，弊在你有張良計，我有過牆梯，部分表演者轉咗去尖沙咀海旁、銅鑼灣行人專用區搵食，單係尖沙咀上個禮拜就有十宗噪音投訴，比起以前成個月只得一、兩宗多出幾個double，證明旺角殺街只係將噪音問題大腳踢畀其他地區，治標唔治本。
講真，港府當年搞個行人專用區出嚟，原意係減少人車爭路，等遊人行街舒服啲，點知港產官僚慣性不負責任，生仔唔養仔咯喎，無王管咯喎，梗係亂象叢生喇，後來仲畀大媽歌舞團進佔，淪為噪音地獄。有區議員同表演者就要求當局設立發牌制度規管，喺指定時間及地點表演，唔係冇得諗嘅，之但係港產官僚永遠抱住少做少錯、唔做唔錯嘅態度辦事，睬你都傻喇。所以話啫，官老爺開口埋口推動文化產業，信佢一成，雙目失明呀。
講句公道話，街頭表演者都唔係個個亂嗌亂唱嘅，部分都有番咁上下水準，否則點會唱首歌都收到三千蚊打賞咁和味吖，一句殺街就將所有人封殺，唔係咁公平嘅咋。再講吖，香港地搵食大過天，係人都估到佢哋會轉移陣地，仆到去第二個地頭搵食喇。港府死都唔肯做好殺街善後安排，由得班表演者帶住噪音四圍走，咪盞其他地區遭殃。
冇計喇，港產官僚無能又動作多多，洗濕個頭就唔識點收科，畀人鬧多幾鬧，索性斬腳趾避沙蟲，之後係點就關人個關。無論係規定小巴上落位置整多一級樓梯出嚟，陰到市民跌倒扭傷腳，定係財政預算案話幫所有考生畀考試費，引起大混亂，一再證明港產官僚正一人頭豬腦。
睇到喇，特區政府冇嘢叻，最叻就係眼高手低，推出嘅政策全部冇經過深思熟慮，開咗個頭就冇相關配套措施配合，到頭來玩殘市民又麻煩自己。殺街之後到底點收科，大家拭目以待喇。