古人講究敬老尊賢，皇帝為作表率，時不時都會搞吓千叟宴，好似康熙就試過邀請全國千多位六十五歲以上老人家，出席佢六十歲生日派對。可惜今時今日香港地冇呢支歌仔唱，一來港府一毛不拔，唔會咁闊佬；二來香港人愈來愈長壽，再搞千叟宴，睇怕幾個大球場都裝唔晒！
唔係誇張o架，日本厚生勞動省日前發表二○一七年度全球平均壽命統計，香港再次蟬聯全球男女「長壽之都」，女性平均壽命八十七點六六歲，男性八十一點七歲，跑贏日本同瑞士等地。講到長壽，功夫茶不期然諗起一單新聞。俄羅斯政府最近計劃將男性退休年齡從六十歲提高到六十五歲，結果民眾嘈到拆天，事關俄羅斯男人平均壽命只有六十六歲，佢哋知道香港人原來咁長壽，肯定羨慕妒忌恨。
正所謂如人飲水，冷暖自知，香港人長壽之苦，真係不足為外人道。大家有眼見，好多老人家七老八十仲要揸的士、揸小巴甚至執紙皮，你估真係貪日曬雨淋過癮咩，「鬼叫你窮呀頂硬上」咁解咋。你知喇，港府安老政策話就話有「三條支柱」，其中兩條嘅個人積蓄同埋強積金，其實即係貴客自理，政府關人個關。剩番一條社會保障安全網，好多長者覺得自己有手有腳不屑政府救濟，加上強積金同積蓄得雞碎咁多好快搣清光，惟有焗住幾十歲人拋個身出嚟做。
特衰政府就係咁嘅嘞，善財難捨，冤枉甘心。大型基建幾億、幾十億掟落鹹水海好地地，叫佢使多啲錢安老就好似食佢隻車咁，明明政府喺強積金僱員同僱主供款之上加多一份，就可以實現全民退休保障，港府硬係耍手擰頭，一味識得為富貴長者錦上添花，「年金計劃」、「銀色債券」、「安老按揭計劃」……名目多多，直頭呵護備至；對最有需要嘅長者就一個崩都計到盡，長者綜援今年只係增加百分之一點四，連通脹都追唔上，平均每人每月多五十皮，高官飲杯咖啡都唔夠，呢啲咪涼薄囉！
講真，長者行得走得自食其力，已經算好彩。第樣唔講，家陣資助院舍僧多粥少，不知幾多長者喺輪候過程中含恨而終，最離譜係政府呢頭話要做到「宿位零輪候」，嗰頭閂定後門，猛呻覓地困難，講明冇十年八載都搞唔掂。即使長者入到老人院亦未必係好事，事關喺當局放任自流下，院舍質素良莠不齊，三日唔埋兩日爆虐老醜聞，難為高官開口埋口「老有所養」，簡直笑大人個口。
始終都係古人講得啱︰己欲立而立人，己欲達而達人。港府肥到着唔到襪，高官自己無後顧之憂，卻坐視長者活喺水深火熱中，知唔知個「醜」字點寫吖！