政情：兒子愛玩飛機 譚文豪：未必遺傳
立法會議員譚文豪（Jeremy）為民航機師，早前出席活動同一大班小朋友齊齊摺紙飛機。佢話平日喺屋企都會利用環保紙，同四歲嘅龍鳳胎一齊摺紙飛機玩，其中囝囝嘅興趣特別大，喺屋企玩紙飛機，去到公園又要玩發泡膠飛機。不過，佢覺得普遍男仔特別鍾意玩車同飛機，所以都未能確定係咪遺傳喎。
忙到無時間揸飛機載家人翱翔
雖然囝囝對飛機有興趣，但Jeremy就話依家太忙，完全無時間揸飛機載佢哋翱翔天際。至於佢自己點培養出對飛機嘅興趣，都係由紙飛機開始，再去士多買飛機玩具玩，聽落同佢囝囝現時所玩嘅都差唔多，可能遲吓囝囝都去考機師都未定。
做機師固然艱難，原來摺紙飛機都大有學問，Jeremy話小朋友太細個，仲未掌握到點樣放紙飛機，所以要指導正確嘅放飛機姿勢，力度唔夠會好易令紙飛機鬆開，所以佢就會用膠紙黐實先畀小朋友玩。