政情：沉醉投起機場一票 馮檢基未瞓醒

書展簽名會拍烏蠅 講座「想當年」

阿基話，九十年代在任立法局議員期間曾投下關鍵性一票，港英政府就興建赤鱲角新機場進行填海工程申請撥款時，政府數過票後發現只差一票先能夠通過，於是就有三個官員向佢拉票，而佢就提出幾個條件並獲回應，結果議案以廿七票對廿五票之微驚險通過。佢透露，主理新機場事宜嘅官員林中麟表決後同佢講，新機場應該叫「馮檢基機場」而唔係香港機場喎，似乎阿基當咗新機場係政績，暗示自己對香港發展有幾重要。

佢又大講八十年代嘅壓力團體，認為當年議題聚焦同專注於艇戶，可以強而有力咁一拳打出去令政府覺得痛喎，所以現時搞壓力團體都要學習八十年代嘅精神，而佢就計劃未來會集中講劏房同醫療等問題。之不過有八十年代嘅精神，但未必有八十年代嘅體力，唔知佢到時仲有冇力揮出重拳呢？

對於被質疑年紀大應該退下火線，阿基就反駁話搞政治要食腦，年紀大咗有經歷就會累積智慧，可以應付突發情況，就好似以前喺英國佔領大學時未有被捕，因為行動非為咗博「拉」，事前就會諗方法喺不被拘捕下去爭取，認為年輕人諗得唔仔細而被拘捕就好可惜，所以最好係年輕人同老年人可以雙劍合璧囉，佢仲話國際間都有政治領袖到六十歲以上先執政。

近年民協又傾又砌嘅立場受到質疑，阿基出書當然亦有辯護，佢認為又傾又砌係一種策略，亦都係好多元化同多姿多采嘅藝術，因為可以傾中有砌、先傾後砌等。睇嚟佢退出民協後都唔會變，因為根本唔覺得自己嘅手法同路線有問題囉。