中環出更：屋企廚房8年冇用過 陳婉嫻自爆煮唔掂
前立法會議員陳婉嫻（嫻姐）已經卸任接近兩年，但年初又獲政府委任為婦女事務委員會主席，距離退休都有段距離，生活仍然忙碌，難怪佢悉心為屋企廚房裝修，但入伙八年來都未用過喇！嫻姐尋日行書展，留意咗唔少烹飪同湯料嘅書籍，佢話烹飪係對佢一大挑戰，因為鍾意食嘢但煮唔掂。
讚媽媽煲湯叻
嫻姐仲自爆，屋企裝修時，廚房磁磚專登揀士多啤梨圖案，仲讚裝修得唔錯，但可惜入伙八年來都冇用過，慨嘆以為離開議會就有機會入廚。不過，嫻姐話都有留意吓點煲湯，仲話只差實踐機會啫。佢更大讚自己媽媽煲湯叻，照顧子女從營養出發，最擅長煲大豆芽豬骨湯，而當年豬骨價格平但營養高，笑言自己生膽石就係食得多豬骨。
另外，嫻姐又分享自幼睇開武俠小說，所以受小說嘅黑白分明世界所感染，培養出自己嘅性格，覺得社會上要有人提出問題引起關注，繼而帶來改變。
卓妮