中環出更：世界盃侯志強鍾意買細 最憎睇入波
世界盃啱啱落幕，一眾球迷又少咗娛樂。上水鄉事委員會主席侯志強話早前都有追睇世界盃，咁佢覺得今屆邊個入球最精彩呢？點知佢竟然答話最憎就係睇人入球。聽落真係匪夷所思，佢就解釋，因為佢睇波時通常都會賭埋波，而且鍾意買細，即係總入球數少過三球，而比賽開始時一定係零比零，覺得自己贏緊錢咁，所以見到入球咪唔高興囉。
問到侯志強係咪鍾意賭波多過睇波，佢就話好多時都只係象徵式咁買少少，唔會賭好大，因為賭少少可以令自己睇得肉緊啲喎。佢又話自己都稱得上鍾意睇波，撞啱時間同場次都會入場睇，特別係喺外國嘅時候，覺得入現場睇，氣氛高漲好多。佢強調，自己真係唔算鍾意賭錢，只不過順住世界盃個勢賭少少，絕對唔係沉迷賭博咁話。
林大輝場場睇 老婆冇詐型
鄉議局主席劉業強一講起世界盃，就即刻分析各隊球隊優劣，仲講明自己一開始就已經係支持克羅地亞同比利時，又話雖然比利時出咗局，但克羅地亞嘅成績實在係值得興奮。而佢特別鍾意克羅地亞嘅中場，有幾個球員都好有實力，相比法國依靠一個前鋒好唔同咁話。
前立法會議員林大輝係一個不折不扣嘅足球迷，直言自己係狂熱分子，仲話世界盃場場都有睇添。話時話，世界盃有成幾十場，唔通佢太太完全冇詐型？佢就話，出街睇波通常都係同朋友一齊睇，但如果喺屋企睇，就多數都係太太陪喇，所以太太唔單止唔會詐型，直頭支持佢睇添。而佢同太太都一致支持克羅地亞，仲大讚呢隊球隊有腳法。不過鍾意還鍾意，都要照顧吓身體，為咗睇波經常捱夜都唔係太好嘅。
卓妮