一年容易又書展，呢個唔止係市民拖篋掃書、書商瘋狂散貨嘅「黃金周」，更加係淫審處丟人現眼、貽笑大方嘅showtime，今勻日本大作家躺着也中槍，分分鐘又變成國際醜聞都似。
好多人都知，日本作家村上春樹嘅長篇小說《刺殺騎士團長》出版咗成年，一直好哋哋，仲一度被視為問鼎國際文學獎嘅大熱之作添。點知書展開鑼前夕，淫審處走嚟贈興，本月初突然將小說評為第二類不雅物品，即係需要「包膠」密封同印上警告字句至可以出售。有書商話喎，淫審處前晚派人突擊檢查，警告唔可以再賣，為免觸犯書展規定，惟有收番起呢批二級存貨喇。
坦白講，村上春樹近年多次被視為諾貝爾文學獎大熱，藝術成就毋庸置疑，雖然話佢嘅作品不乏性愛描寫，之但係包括內地及台灣在內，全世界冇一個地方會將佢嘅書當成鹹書，列為不雅物品。淫審處敢為天下之先，到底係獨具慧眼吖，標奇立異吖，定係真心膠，大家心中有數喇。呢嗱，唔止書商質疑淫審處評級冇標準，就連帶埋仔女一齊逛書展嘅家長亦感到匪夷所思，有人揶揄淫審處同世界脫軌，不如只准書商賣聖經，唔係冇道理(o架)。
鬼咩，淫審處評審出名亂咁嚟，連文藝復興時期嘅大衞像都曾被評為不雅，搞到「轟動國際」。好似今次事件咁，淫審處成員坦言無時間閱讀全書，只係斷章取義咁檢視，連作者係乜水都唔知。喂，連港姐評判都要睇晒所有佳麗嘅表現先可以評分，淫審處唔睇上文下理，淨係聚焦喺部分性愛描寫嚟評審，邊公平(o架)。咁搞法，載有亂倫、一夫多妻、姊妹奪夫等內容嘅聖經係咪都要包膠呀？
話時話，類似嘅擾民事件絕非個案，幾年前書展都發生過，嗰次就由影視處出面，話一本希臘羅馬神話故事書印有一幅裸體名畫，叫書商抽起本書唔好賣，結果輿論狂轟先至知衰，改口話冇問題。再講番淫審處啲離譜嘢吖，最經典梗係評審同一輯外國女星嘅性感照片，出現三種截然不同嘅評級結果，登喺東方報業集團旗下報章就評為二級不雅，登喺壹淫媒旗下爛果報就被評為一級非不雅，登喺香港有得賣嘅外國雜誌就直頭連送檢都慳番，唔止冇制度冇準則冇規矩，直情玩針對喇。
都係嗰句喇，政府靠得住，豬乸會上樹。堂堂大作家淪落到同「蛇貓狗」一堆鹹書齊名，香港都算威震國際咯。政府部門淨係識揸住雞毛當令箭，所謂評審純粹睇心情說了算，唔鬧出笑話至奇吖。