冇神經政府凡事愛拖拖拉拉，所謂「民生無小事」，講到政府施政好似「樂民之樂者，民亦樂其樂；憂民之憂者，民亦憂其憂」咁款。事實上，執政為民，除了推動經濟民生惠及社會的大事，亦應關注與市民生活息息相關的小事。
政府講就天下無敵，執行起來卻無心無力。話說政府早於○九年提出上坡地區自動扶梯連接系統和升降機系統計劃，以方便居民出入，之不過十八個項目至今僅完成三項，另有四項仍處於初步研究階段，動輒要再等十年八載。阿哥，搞部自動扶梯都要研究研究再研究，咁搞法真係「天亦有情天亦老」！老朽看過一副對聯，道出了官僚的處事心態，上聯是「你開會我開會大家都開會」，下聯是「你發文我發文大家都發文」，橫批是「誰來落實」。香港速度之所以變成龜步蝸行，就係冇人去落實，一味口噏當秘笈。
其實，只要將那副對聯略改一改，就更加切合香港目前的情況：上聯「你研究我研究大家都研究」，下聯「你諮詢我諮詢大家都諮詢」，橫批「誰來執行」。事實擺在眼前，本報「探射燈」披露，未動工的上坡地區，居民要頂着烈日苦撐百多級樓梯，像年逾七十歲嘅馬鞍山居民梁伯，從西沙路一口氣爬一百零一級樓梯往富寶花園平台，老人家膝頭哥多數唔夠力，可想而知係幾咁痛苦。富寶花園人口上萬，上述樓梯位置早被納入有關計劃建議項目，惟至今仍停留在初步研究階段。
有區議員表示，該區長者人數較多，不時有涉及長者上落樓梯的意外，希望政府早點落實有關計劃。可惜你急佢唔急，路政署表示仍需就項目進行土地勘測、初步設計等，表明不會在短期內完成。要言之，評審有程序，施工待研究。按照新修訂機制篩選及制訂新建議的優次，很多老人家恐怕無緣見到這「愛的上坡電梯」了！