政情：新同盟派女將挑戰劉國勳
一向陽盛陰衰嘅新民主同盟二○一五年嘅區議會選舉中共有十六人參選，唯一嘅女將王珮芝就敗陣。區議會換屆選舉明年就到，佢哋最近就再有新女將，就係曾經做過幼稚園教師嘅林淑菁（Mary）。而Mary仲已經有大計，考慮緊喺佢自己住緊嘅北區欣盛選區出戰，挑戰身兼立法會議員嘅當區區議員劉國勳，唔知佢會成為該黨首位女區議員，定係步王嘅後塵呢？
做做吓議辦職員落埋區
Mary加入新同盟都係偶然，事緣該黨立法會議員范國威喺粉嶺開辦事處，Mary有日買餸時走入去問有無人參選欣盛，冇耐佢就做咗議辦職員，依家仲索性落埋區添。而Gary尋日就話，明年區選佢哋已有廿人有意參選喇。
曾做過幼稚園教師同遊戲小組導師嘅Mary都有啲藝術天分，佢上網睇片就學識扭氣球，得閒都會扭嚟氹小朋友開心。最近佢又研究緊製作永生花，睇嚟遲啲街坊又有多一個興趣班選擇喇。