中環出更：行管會幫議員買旅保 包啲唔包啲
去旅行除咗要訂酒店、兌換外幣，少不免會買埋旅遊保險，萬一有咩事都有多重保障。而立法會議員間唔中都會去外訪，立法會雖然都有幫議員買保險，但原來只係包啲唔包啲，只包一般意外，萬一有議員去咗啲高風險地區，唔好彩畀人綁架咁就唔包喇。
高風險地區畀人綁架唔包
話說尋日立法會行政管理委員會就開咗個有關保險嘅簡介會，同立法會議員介紹立法會第三者保險、汽車保險同辦公室險等事宜。議員鄭松泰就關注議員外訪工作如果發生意外，行管會當然會包啦，但如果去巴西或一帶一路等地方，有議員或議員集體被綁架，保險又會唔會包呢﹖佢就話，保險公司同佢哋講，咁樣係唔包嘅，但議員可以另外買同綁架有關嘅特別保險喎。
早前立法會食物安全及環境衞生事務委員會先打算搞巴西「睇肉團」，去巴西訪問，了解當地肉類進出口檢疫等情況。
南美洲一向治安麻麻，好彩最後唔成團，否則議員去到唔好彩畀人綁架，都唔知原來立法會啲保險係唔包綁架喇。鄭又話，佢已要求秘書處日後要提醒議員，去高危地方要考慮買特別保險。不過由於立法會唔包特別保險，議員可能就要自己找數喇。
卓妮