中環出更：陳首銘減磅 靠冰鎮咕嚕肉？
潮流興健康飲食，個個都話要少鹽少糖少油，相信做食肆生意嘅商家都偷笑，事關慳番唔少成本。早前喺博愛醫院一個活動上見到副主席陳首銘，佢笑稱旗下酒樓確係用少咗油鹽糖，不過講起健康菜式，好多人都覺得味道必然減分，所以業界不時要諗計，令味道及健康兼備，例如冰鎮咕嚕肉就係一個成功例子，唔止比傳統做法健康，味道仲加分添。
陳首銘話，咕嚕肉嘅傳統炮製方法用油勁多，通常係油炸豬肉之後再兜一兜芡汁。改良嘅做法就係炸完之後，即刻將啲肉用大量冰塊隔住冰鎮，逼啲油分出嚟。由於一冷一熱嘅關係，外皮會更加爽脆，食入口感覺油分都少啲。卓妮見佢明顯瘦咗，唔通係食多咗呢啲健康菜式？佢就笑稱係，加上夜晚食少啲，結果一個月就減咗十幾磅喎。
廖齡儀藍王雲仙提早抖完暑
同場仲有主席李鋈發、總理廖齡儀（Candy）同藍王雲仙（Mina）等人。暑假啱啱開始，好多城中大忙人正計劃外遊抖暑，不過Mina同Candy就已經分別遊完美加返港，難怪望落咁容光煥發。Candy去咗歐洲同加拿大玩，Mina就同老公藍國慶去咗美國洛杉磯玩足一個月。Mina話明顯感受到美國經濟復甦好強勁，同十年前金融海嘯爆發後嘅蕭條情況冇得比。
而做鐘錶生意嘅總理吳志雄當日都喺度，佢主要做出口美國嘅生意。雖然鐘錶暫時仲未捲入中美貿易戰嘅漩渦中，但係佢都擔心遲早受到影響，希望貿易戰快啲結束咁話。
卓妮