政情：曾智明：點解畢業要買到樓

話買樓唔一定代表安居

曾智明話「安居係咪一定要買樓，買樓係咪代表安居」，如果樓價不斷上升，買咗間樓，升咗後賣出，但又買唔番，點會係安居呢？佢認為年輕人買樓，如果考慮過承擔得起風險就可以做，依家嘅年輕人都有考慮到買樓嘅風險，只係唔知點樣做，比較徬徨，對於買唔起樓嘅青年，政府應該提供一啲居所畀佢哋。

佢又提到，佢嘅智庫依家有約一百個年輕人幫手搞民生研究，包括喺內地同香港讀書嘅人，有唔少係基層人士，認為佢哋代表到嗰一群嘅青年人聲音，可以深入了解佢哋希望政府提供乜嘢畀佢哋。