中環出更：爆屈基內幕 馮檢基鬧朱凱廸講大話
今年初立法會四席補選提名期開始前，泛民進行初選，發生「屈基（逼退馮檢基）」事件。馮檢基（阿基）尋日就喺佢新書發布會上，大爆「屈基」內幕，指斥議會陣線議員朱凱廸「不斷講大話，明明暗中策劃搞Plan B，但係敢做唔敢認，賴得就賴」，令阿基耿耿於懷。
新書詳細列出初選期間各人對話同周旋嘅過程，問到係咪持有錄音，阿基冇正面回應，只係話「親眼、親耳同親身所知嘅事，係事實」。書中引述朱凱廸多番明言，阿基出戰無勝算，「初選姚松炎贏你咁多，你咁少票，你贏唔到啦」，朱又稱「你（阿基）打中場，我哋要前鋒」。書中更披露，民主派十八人曾召開會議討論「Plan B」，阿基認為眾人背着佢開會，佢被排斥在外，唔接受眾人擬定嘅「Plan B」名單，對此消息感到如五雷轟頂。
唔考慮參加補選
另外，阿基又喺書中指自己多次讓位畀後生仔上位，卻以「自己才六十三歲，對政治人來說，正是當打之年」為該章節結尾。被問到係咪指會考慮參加補選，佢就話依家唔考慮，咁一九同二○年嘅區議會同立法會換屆選舉會唔會考慮？佢就話「到時先算」。
卓妮