中環出更：90公斤重量級陳承邦落水變飛魚
仁愛堂副主席陳承邦雖然係重磅之人，但其實佢係一位游泳健將。日前陳承邦喺仁愛堂首次舉辦嘅慈善水上競技大賽中一展身手，其游泳速度之快令在場觀眾深感折服。陳承邦今次係搵埋同事組隊參賽，並於四乘二十五米嘅接力賽當中負責最後一棒。由於前三棒嘅隊員實力唔及對手，陳承邦一接棒後即全力追上，快速拉近同對手嘅距離不致成為包尾大幡。
陳承邦賽後話自己約莫三、四歲已學游水。儘管曾嗆過幾啖海水，但佢並無因而嚇怕，反而認為係熟習水性嘅必然經歷，後來讀小學並成為校隊嘅一員，更喺「東區水運會」奪得全場總冠軍。
許友堅游25米只抬頭呼吸1次
不過，佢自從去咗英國升學就再無參加同游泳相關嘅賽事，一晃眼就過咗廿幾年，而佢嘅體重亦由當年嘅小飛魚時代，約三、四十公斤逐步攀升至依家嘅九十公斤。佢又話若果身材清瘦些少，水中阻力較低游泳速度應可更快。
仁愛堂總理許友堅係另一位參與接力賽嘅董事局成員。佢高速游泳嘅秘訣同陳承邦一樣，以減少呼吸次數來提升速度，然而佢更進一步，整段二十五米只抬頭呼吸一次。
佢話自己之所以咁「長氣」，皆因閒時有練打泰拳。佢又話男人要有健康嘅體魄至可以孭起整個家庭，不容偷懶唔做運動。
至於做鳴槍嘉賓嘅仁愛堂總理陳映彤就帶同囝囝觀戰，佢話囝囝都有學游水並已掌握基本功，但如果囝囝將來都對水上活動有興趣嘅話當然就更好嘞！
卓妮