古人話齋：「賞罰不明，國政不清。」香港基建延誤超支淪為常態，沙中線醜聞鑊鑊新鮮，原因一字咁淺，就係賞罰不明，搞到尾都係由納稅人埋單，問你點頂？
呢，運輸及房屋局前局長張炳良在任嗰陣矇查查，下台後就鬼拍後尾枕，突然醒番。尋日佢喺電台評點沙中線單醜聞，話港府可以向港鐵索償，不過金額頂盡都唔會多過港府畀嘅管理費。即係話，唔理沙中線最終損失有幾大，港鐵最多咪當冇咗筆管理費收入嘅咋。佢仲將矛頭指向港府委託港鐵管理嘅「委託協議模式」，話呢個模式唔完美，應該改做港鐵出錢兼負責工程興建同營運，政府只係負責資金缺口嘅「擁有權模式」喎。
心水清嘅人聽得明嘞，張前局長講咗咁多，即係喺沙中線醜聞之中，錯嘅唔係港鐵，亦唔係港府，甚至唔係承建商，千錯萬錯都係制度嘅錯，係管理模式嘅錯，情況好比早前嘅鉛水危機咁，冇一個人需要問責。最諷刺嘅係，港府當年雖然有就索償上限開聲要求提高，不過工程已經開咗波，惟有等工程完晒，至透過法律程序解決。
查實就算打官司又點吖？港府係港鐵嘅大股東，最終邊個輸邊個贏都好，結果咪又係庫房出錢！再講吖，法律程序係燒錢遊戲，講到尾又係公帑找數，明搵納稅人笨啫。當然喇，啲錢唔係由官員自掏腰包，佢哋又點會知痛吖！
有人講過：「制度不好，好人也做不成好事。」香港情況更加絕望，制度唔好唔使講，為官嘅更加冇個好人。就講運房局同路政署，好明顯係冇負起監管責任，諗住既然港府每年就沙中線項目畀咗約十億元管理費過港鐵，就疊埋心水乜都唔理，連監管責任都外判埋畀港鐵，咁嘅制度令懶官有空間、藉口懶，試問點會唔出事呢？
所以話啫，想要撥亂反正，唔係改行乜鬼「擁有權模式」，最緊要係引入「高官扣薪制」，即係將高官人工同工作表現掛鈎，失職嘅扣人工，嚴重失職嘅更加要追究責任。好似主理運輸同房屋嘅陳帆局長咁，沙中線出事後，佢話自己「睇報紙至知」，將監管不力嘅責任卸得一乾二淨。既然佢老哥好似路人甲，憑乜嘢月月穩袋三十幾萬銀？
講起都好笑，特區班子個個叫做「問責官員」，其實根本得個名，出咗事唔使問責落台，只需使出厚顏神功，講句「深表遺憾」就算。問責制根本係呃人，有責不問、有問不責至係真，想班官老爺打醒十二分精神做好份工，唯一辦法就係要佢哋針拮到肉，等佢哋知痛。