政客面皮厚，撒謊當食生菜。睇吓美國總統特朗普工作訪問英國，謊言與口不對心的廢噏齊飛，你就明白政客不說謊無以活是常理。狂人深知自己不受英國上下歡迎，還扮處之泰然話「很多英國人都喜歡他」，然而，反對他到訪的英國民眾示威不絕，人數超過十萬人，最新民調亦顯示，約七成七英國人對特朗普冇好感。
老朽可以肯定，特朗普此次訪英絕對不爽，是以「拜見」九十二歲的英女王、檢閱儀仗隊時，狂人一味自己快步行，讓英女王要喺佢身邊繞來繞去，無所適從。其實，自己作客，只要心態稍為謙遜些，讓老人家先行一步，便不會被指違反英國皇室規矩，英國人也不至於火上加油，指狂人粗鄙冇教養。
英國人睇唔起特朗普，乃歷史文化不同使然，而狂人對英國早懷芥蒂，又點會把弱勢的英國首相文翠珊放在眼內？特朗普在訪英前大肆抨擊文翠珊的「軟脫歐」方案，又刻意大讚劈炮唔撈、支持「硬脫歐」的前外相約翰遜有能力成為「偉大首相」。阿哥，你如此抬舉英揆嘅政敵，叫文翠珊的臉往何處擱？其後英媒報道狂人的不遜言論，他又立刻變臉，用佢慣用嘅一招──指斥傳媒發布假新聞，自言在訪問中一再稱讚文翠珊英明能幹，強調美國會支持英國脫歐決定並彼此加強合作云云。政客的虛情假意，認真令人作嘔。
事實上，特朗普急於親俄，有其外交上的務實，像和伊朗的關係，只要俄羅斯出面調停，美伊當前的緊張關係，解決起來必事半功倍。而有了俄羅斯這張牌，狂人跟歐盟各國討價還價將更有底氣。很明顯，狂人在訪問英國時對俄國釋出善意，甚至不理會「通俄門」發酵，又怎會理會文翠珊的感受？文翠珊如果認為狂人可以相依，那是沒有帶眼識人；「感情」被呃，只能怪自己太傻太天真！