政情：結婚大談侍產假 馮興禮諗生B？
勞工及福利局局長政治助理馮興禮（Henry）上周四喺英國結婚，同拍拖近七年嘅馮太拉埋天窗。Henry話，佢講「我願意」時都眼濕濕，又大談侍產假喎，唔通……大家唔好誤會，佢哋不打算咁快生BB住，其實Henry係講起今次請婚假，怕撞正侍產假排上立法會大會嘅日期啫。
原來怕婚假撞立會修訂法案
Henry話，一早已同局長羅致光講定幾時離港，點知佢跟開嘅侍產假修訂可能上大會，佢問局長點算，局長都話冇問題。後來因為有議員堅持成立法案委員會，令有關修訂冇咁快上大會，所以佢就可以安心去英國結婚嘞。
講番婚禮，Henry話喺戶外搞，所以特別擔心天氣，睇咗成個禮拜天氣預報，好彩最後天氣好好，有陽光，不過行完禮翌日就有雷暴，睇嚟馮太腳頭真係好。佢又話兩人工作太忙，所以明天就會返港，遲吓先度蜜月喎！