政情：觀塘音樂噴泉 做樣安撫區會 批錢等下年度

上屆政府提出喺全港十八區預留一億元進行「社區重點項目」，觀塘區分開兩次申請撥款，分別於崇仁街興建升降機塔及於海濱興建音樂噴泉，前者涉款約四千萬元，早於一六年五月已於財委會獲得撥款。根據建築署資料，工程將於一八/一九年度竣工。不過，另一項音樂噴泉工程就多阻滯，自一五年首次推上工務小組以來，三度闖關先獲得通過。據聞上周二觀塘區議會主席陳振彬喺該區議會大會上，大呻自己為咗呢個噴泉項目，三年間出席咗立法會會議廿三次，講到既無奈又心急。

變相畀民主派偷時間打輿論戰

工務小組委員會主席盧偉國接得「硬任務」都絕不鬆懈，一早喺委員會最後一次會議上劃線，但殺出程咬金——新同盟范國威，守尾門發言時提出中止待續，成功令項目拖延多一個會議。而加會當日，建制派堅守「封口令」，人人坐定唔發言，令項目火速獲得通過，即令盧偉國鬆一口氣，第廿四次上立法會嘅陳振彬更喜上眉梢。

不過根據最新財委會議程，噴泉未有在審議項目之內。據了解，當局心中計劃只求於工務小組通過，以安撫區議會，下一步都要等下個立法年度先講。財委會主席陳健波確認，此項目不會在休會前放上議程，至於會否擔心下年度審議時有阻滯，佢就話會「嚴格把關」。而九龍東立法會議員譚文豪就批評，到底政府要為噴泉做幾多次「特事特辦」，講明復會後會繼續問，似乎未開波已聞到火藥味。

觀塘區議會方面，民主派處於劣勢，連同獨立友好都只得九人。據了解，民主派將偷暑假時間，將戰場轉往地區，畀市民了解更多詳情及提供其他選項，冀望抖暑內可爭取更多民意。

接下來兩年分別係區議會及立法會換屆選舉，建制派嘅直選議員於立法會內投票嘅壓力會更大，唔知到時會否有人臨陣倒戈呢？