開講有話：「唔怕生壞命，最怕改壞名。」喺港鐵沙中線醜聞搶晒鏡嘅外資總承建商，個名真係改得夠絕。由醜聞爆出到依家，佢哋都係例牌逃遁，從來冇現身解畫。正如「陰澳」貪好聽改名「欣澳」，「例遁」改少少咪「禮頓」囉。
呢，立法會鐵路事宜小組委員會尋日開會，講沙中線紅磡站擴建月台鋼筋被剪短壇蘇州屎。禮頓又一次冇派代表出席，而負責落石屎嘅二判商就玩踢爆，指名道姓話港鐵沙中線土木工程總經理，至少三次問及佢關於剪鋼筋嘅事，而佢亦喺前年年尾同港鐵工程總監傾過剪鋼筋問題，不過港鐵高層今年五月爆出醜聞後，竟然話傳媒查詢至知，質疑係咪有人知情不報呢？
唔止咁呀，有議員話紅磡站北面隧道有幅滲水牆，裏頭唔少鋼筋同螺絲頭根本冇連接，有啲直頭連保護蓋都未拆，想好似林鄭選特首句口號「WE CONNECT」都唔得啦，港鐵代表死死氣承認監管不足，運房局竟然執死雞，話唔接受港鐵冇及時通報，講到政府完全冇監管責任咁款，問你服未。
即係咁，沙中線醜聞爆唔停，但禮頓就三催四請都唔現身交代，想兜口兜面問佢責都唔得，來來去去都係議員開火質詢、港鐵有限度披露內情、港府搵位閃，今次加多個講明費事將來孭鑊所以爆料嘅「洩密者」，由呢幾個單位輪流唱戲，唱嚟唱去，都係冇人需要問責，廉署亦唔肯講明會否跟進，警方調查更係冇聲冇氣，即係嘥氣啫。
冇計喇，禮頓恃住手握多項數以百億元計嘅港府工程合約，「大到不能倒」，港鐵同港府都買佢怕，梗係蛇咬都唔出嚟啦。至於港鐵乜都唔知情亦都冇乜出奇，事關班高層「日理萬機」，掛萬漏一，咁喺明知故犯同不知者不罪之間，梗係扮係後者博吓同情喇，唔係有個洩密者走出嚟搞寸Party，條橋過咗骨喇。
講到尾，最衰都係一班廢官，運房局作為監管部門，居然冇負起監管責任，諗住每年就沙中線項目畀咗約十億元管理費過港鐵，就連監管責任都外判，乜都闊佬懶理。運房局局長陳帆唔止夠膽死話「睇報道至知」，尋日仲潛水缺席會議，完全係識得出糧，唔識做嘢嘅典範。
都係嗰句喇，沙中線醜聞冇人係無辜，港府、港鐵、總承建商統統有責任。家陣一個二個唔係隱形，就係互相賴皮扯貓尾，就好似紅磡站嗰啲問題鋼筋同螺絲頭咁九唔搭八。咪畀功夫茶批中，一條千億鐵路旨意呢班人去搞，醜聞一定陸續有來呀。