政情：馮檢基另起爐灶 講明唔同建制合作
曾擔任民協主席十八年嘅前立法會議員馮檢基（阿基），前日退出由佢有份一手創立嘅民協，並預告正在籌組壓力團體。阿基尋日接受電台節目訪問時話，壓力團體能夠聚焦討論民生議題，唔使好似政黨咁，要考慮社區工作及選票，又表明若果壓力團體處理議題時需要政治力量，都可以同民主派政黨合作，包括民協，不過佢表明唔會同建制派政黨合作喇。
稱唔介意立會議員加入
阿基其後話，目前仍在初步階段籌組壓力團體，參與者包括三名區議員，至今已經召開咗四、五次會議，佢又聲稱唔介意有立法會議員加入其組織喎。
被問及未來會否參加立法會選舉，於今年初立法會補選泛民初選時曾聲稱係「最後一擊」嘅阿基，對此就冇正面回應，只係話政治人never say never（永不說不）。究竟今年十一月底嘅立法會九龍西補選，阿基會否落場參選，時間將會證明一切。