政情：陳澤銘踢得又教得 早過修夫基考到牌
呢個月大家嘅話題離唔開世界盃，今晚仲有英格蘭同比利時爭季軍戰添！講起踢波，唔少人細細個都會去公園踢波，踢踢吓就會入咗校隊或球隊，律師會新任副會長陳澤銘亦都唔例外，仲試過代表香港踢亞洲青年賽添！唔好睇佢斯斯文文，其實佢早喺二○○七年已經考到足球教練牌，仲早過今屆英格蘭隊教練修夫基取得牌照。
同山度士李健和做過隊友
熱愛踢波嘅陳澤銘，係第一屆香港青少年地區足球訓練計劃嘅成員，喺八十年代仲畀前港隊教練郭家明睇中，揀咗佢去當時嘅銀禧體育中心、即現時嘅香港體育學院集訓添。當年佢係踢中場，前香港足球先生李健和同山度士仲係佢啲隊友。
雖然陳後來放棄咗做職業足球員，選擇咗去英國讀法律，但佢冇放棄過足球，仲考咗個歐洲足協B級教練牌。不過，佢依家就少咗踢波喇，事關曾經整傷腳，所以近年都只係踢吓「衞生波」。此外，佢仲有喺香港足球總會做技術及競技委員會委員，又教吓小朋友踢波，借機會過吓踢波癮。