政情：返工式健身 戴澤良搣走35磅
中華廠商聯合會（廠商會）名譽會長戴澤良（Tony）近半年少咗出席公開活動，早前見到佢好明顯瘦咗，精神亦十分飽滿，究竟做咗咩嚟？原來佢卸任廠商會副會長及展覽服務公司主席之後，終於有番啲自己嘅時間，於是開始「投資」健康，日日到健身室做運動一個半小時，好似返工咁，結果半年減咗三十五磅，狀態大勇。
食嘢斤斤計較 腰帶扣緊三格
Tony笑笑口話，早幾年日日趕場出席應酬活動，夜晚經常食得夜又肥膩，加上飲酒，唔止體重直線上升廿磅，健康亦響起警號，所以佢就的起心肝勤做運動，食嘢亦「斤斤計較」，盡量每日唔食超過二千卡路里食物。結果磅數就直線下降，依家腰帶都扣緊咗三格添。
佢又分享唔少減肥嘅貼士，例如食嘢要慢慢咀嚼，有時臨瞓前口痕想食嘢，就即刻去刷牙兼且用埋漱口水，令到想食嘢嘅意欲減低。聽落的確係好辦法喎。