中環出更：造地有排忙 黃遠輝公職減磅
向來有「公職王」稱號嘅土地供應專責小組主席黃遠輝，罕有地獲政府開綠燈「減磅」公職。話說佢最近四出就土地大辯論收集社會各界意見，加上早前有港府高層放風唔想十月施政報告於土地供應問題上「交白卷」，睇怕佢未來兩個半月實忙到氣咳，至少要匯集民意對造地選項嘅初步傾向供政府參考。
從能源諮詢委員會卸任
事有巧合，政府尋日公布多個委員會嘅任命，黃罕有地公職「減磅」，其中有關負責就能源政策畀意見嘅能源諮詢委員會委員任命，合共有十人卸任委員，包括黃、行政會議前成員張志剛、會計師公會前會長趙麗娟等人；至於工業總會會長郭振華則獲再度委任為該委員會主席，任期於明日起開始，為期兩年。
不過，政府同日委任離職公務員就業申請諮詢委員會委員，本身係委員嘅黃遠輝繼續榜上有名，新任期由九月一日至二○二○年八月底。話時話，黃身兼咁多公職，睇怕真係要做好時間規劃。
卓妮