中環出更：立會壓軸音樂會 盧偉國唱歌甩轆
立法會過去一年舉辦過多場午間音樂會，今個立法年度已到尾聲，立法會尋日亦趁機上演壓軸一場音樂會，多名立法會議員同學生齊齊表演，點知最尾都係甩轆收場，精通多種中西樂器嘅工程界議員盧偉國竟然唱歌入錯拍子。同場嘅仲有極地探險家李樂詩等嘉賓，唔知會唔會覺得班議員貽笑大方呢﹖
呢場音樂會係由青年音樂訓練基金演出，創會主席蕭炯柱擔任指揮，多名議員就登場客串，吸引到李樂詩、港鐵車務總監劉天成等前來聽歌。其中盧偉國再次表演擅長嘅色士風，同樂團合奏《江河水》，之後再同立法會秘書長陳維安（Kenneth）、議員陳淑莊（Tanya）同范國威合唱經典金曲《萬水千山縱橫》。
不過，充滿音樂細胞嘅盧偉國竟然甩轆，唱歌時入早咗拍子。佢事後就話，每首歌處理方法唔同，數錯拍子就好易入錯o架喇。齊齊唱嘅Kenneth都笑晒口，解釋唔到點解唱早咗，佢話自己太投入，冇留意到盧偉國出錯喎。佢又話，自己唔止跟大隊練習，私下都有再下苦功練唱歌，而且唔係趁沖涼時先唱，因為沖涼唱會睇唔到歌詞咁話，似乎都好認真練習。
而Tanya獻唱後，法律界議員郭榮鏗就送上一大束鮮花，佢就話之前只係同對方講笑，冇諗過真係有花收，搞到都有啲唔好意思。最後佢就將花轉贈樂團，又講笑話如果係花球就搶住要喎。
蕭炯柱盼教青年面對觀眾
蕭炯柱就即場「賣廣告」，話只要有心學音樂嘅青年都歡迎加入佢哋，仲話佢哋唔似一般音樂老師，要睇學生嘴形同音樂感等，只希望可以教導年輕人挺起胸膛面對觀眾。而獲盧偉國邀請到立法會聽音樂會嘅李樂詩就覺得，訓練青年玩樂器都同佢嘅工作相似，因為都係栽培幼苗咁話。
卓妮