政情:莫乃光突失聰 睇波唔夠瞓出事

資訊科技界立法會議員莫乃光(Charles)上星期右耳突然失聰,已經接受治療並有所改善。佢尋日出席立法會會議時就自己斷症,話唔排除突然失聰原因係唔夠瞓,加上近期捱夜睇波喎!

話畀自己休息機會

Charles表示,上星期三早上右耳突然失聰,連太太呼喚都聽唔到,搞到畀太太話。食咗藥後有所改善,但耳仔仍然塞塞地同埋耳鳴,對低頻聲音唔太聽得到,喺空曠地方時聽力亦都比較差。Charles作為IT人,當然有善用網上資源搜集有關資料。佢發現病毒感染、免疫系統出事等都會引致突發性失聰,而佢估計自己出事係關壓力同唔夠瞓事,因為佢經常夜瞓,但朝早又因開會要六點起身,再加上近排捱夜睇波,咪搞到身體「示威」囉。

不過佢都好樂觀,話病情雖然帶來不便,但就畀佢一個休息機會。佢都慶幸自己夠資源可以向私家醫生求診,但就覺得普羅大眾無咁多資源,容易因耽誤搞到惡化喇!

第一手消息請下載on.cc東網iPhone/iPad/Android/Windows Phone Apps