開講有話：「橘越淮而枳」，唔理係照抄日本、歐美嘅行人專用區，定係全球新經濟模式嘅網約的士、共享單車，總之遇着班大事唔識做、小事做唔好嘅港官，一律唔使旨意有運行，統統出現水土不服，難逃冚旗厄運呀陰功。
呢，香港首間共享單車公司尋日就宣布清盤投降唔玩，因為喺香港做咗成年有多都賺唔到錢，但係維修單車條數就鬼死咁重皮，唔想賺埋都唔夠整車，所以決定結束香港業務。公司高層仲特別寄語香港人「請保持耐心並繼續愛惜我們的單車」，臨別都要抽抽水，寸吓港人唔文明、唔自律，鍾意搞破壞，平衡番敗走香港嗰啖冤屈氣。
本來呢，做生意嘅嘢就好似達爾文話齋：「物競天擇，適者生存。」搞唔掂要摺埋都只係技不如人，冇話可以怪得邊個嘅。奇就奇在，共享單車喺唔少地方都大行其道，大受歡迎，獨係喺香港搞極唔起，仲要淪為立法會議員口中嘅「被偷、刑毀同違泊角色」，仲慘過趴街。講到底，之唔係對香港人嘅「文明質素」缺乏了解，同埋高估咗香港政府辦事能力咯。
唔使講其他，呢款共享單車舊年落地冇耐，就被人掟落城門河，有啲就被人鎅爛座位、剪斷威吔線、扑爛車尾燈，連手把軟膠都撬走埋，得番光禿禿嘅單車架，仲有人將共享單車「拍賣」添，呢啲固然反映咗部分港人質素低，另一方面亦都反映警察執法不力，令手痕友為所欲為，不斷進行惡意破壞。
唔止咁呀，有好多共享單車用家唔自律，踩完車就隨街亂泊，阻塞道路，搞到沙田、上水同將軍澳居民怨聲載道，要求政府正視單車違泊問題。不過你有你投訴，政府有政府當你冇到，由得你哋兩班人互鬥，多得政府嘅放任自流，搞到原本出發點係利民嘅共享單車，變晒做擾民嘅根源。
講起都可悲，北大人早前開腔要香港成為國際創科中心，港府鸚鵡學舌跟住照講，不過講講埋埋一大堆「智慧城市」、「創新科技」，實際上全部係廢噏。唔好話共享單車敗走香江，就連網約車、電子支付呢類新興經濟模式，喺香港都係做乜死乜。鬼咩，憑住港產官僚老鼠般嘅視野，仍然停留於摸索如何使用八達通嘅層次，同佢哋講創新經濟，直頭對牛彈琴。難為港府仲成立咗一個乜鬼創科局，除咗養一大班廢人，根本就冇價值。
一句到尾，創新科技、共享經濟已經係全球大趨勢，好心官老爺咁近城隍廟就學一學鄰近嘅深圳，否則咯喎，香港點止被人拋離九條街，直頭連車尾燈都望唔到喇。