政情：DQ事件一周年集會 邀游梁出席冇回覆
社民連梁國雄（長毛）、香港眾志羅冠聰、劉小麗同姚松炎喺舊年因宣誓風波而被取消立法會議員資格（DQ），DQ四子同民主派將喺本周六、DQ一周年正日，喺政府總部東翼前地外，發起「反對褫奪（DQ）議員資格」集會。羅冠聰話曾聯絡同樣被DQ嘅青年新政梁頌恆同游蕙禎，邀請佢哋出席集會，但未獲回應。
羅冠聰話過去一年政府持續打壓，認為如社會再唔團結同集合力量，港人嘅政治權利同應有文明都會被侵蝕，呼籲港人要堅持下去，化悲憤為力量，唔好放棄。姚松炎就批評政府無所不用其極DQ議員，係為咗令社會失去監察政府嘅能力，呼籲市民一齊譴責政府，否則政府將更猖狂，造成更多貪污造假。
