政情：無官一身輕 張炳良爆料 「橫洲事件係冤案」

開名批評黃偉賢鄺俊宇

張炳良話發展大型房屋項目，一向係分幾期，自己向「三司會」匯報，亦冇人反對，又反問「touch base（摸底）有乜嘢問題啫」，呢種做法係先了解各方睇法，摸底不一定有會議紀錄，但會有內部文書，電郵亦顯示不止見鄉事，亦有見泛民嘅黃偉賢同鄺俊宇，惟黃鄺二人否認，「個紀錄有喎，你想唔想我show埋個紀錄出嚟吖」，張強調，見唔係問題，「點解會炒到官商鄉黑」，炒到萬七個單位變成四千個。

提醒「不向惡勢力低頭」

佢又話事件對公務員非常唔公道，自己嘅教訓係「瞓喺度都中槍」，但政治現實係咁，只能提公務員「戰戰兢兢，紀錄齊全，充分交代、不向惡勢力低頭，不論惡勢力係政治光譜哪一邊的」。講開房屋，佢又承認香港有地產霸權，任何有樓人士都希望個市唔好跌，政府出辣招，市場都一定會聲稱係冇用。

五年任期結束，佢離開熱廚房，原來佢喺在任期間曾兩次準備辭職，一次係高鐵延誤事件，佢話當時被無限上綱，自己被指摘同港鐵公司合謀隱瞞延誤，而事情完全唔係咁，當時若相關嘅獨立專家小組研訊後，認為佢嘅行為造成高鐵延誤，佢會立即辭職，承擔責任，第二次係高鐵追加撥款，若喺死線前未能通過就要停工，仲叫港鐵公司做倒數安排，停工嘅代價以百億元計，若當時未能通過，佢就會宣布停工並引咎辭職。

近日沙中線同高鐵都備受爭議，佢認為將來興建鐵路，唔應該再用「委託協議模式」，又直指港鐵係「壟斷者」，港鐵係上市公司，官員喺港鐵董事局亦受到限制，要確保公司利益受到保障，希望港鐵公司毋忘初衷，不過，佢認為若港鐵有利益係益小股東，所以政府以往容許港鐵發展上蓋物業以處理資金差額，日後唔應該咁樣做，應改以現金補貼，並將上蓋物業公開招標，以確保無利益輸送。