中環出更：調動公務員加薪議程 暑假前或通過

前面仲有3個議程

影響十七萬公務員嘅加薪方案早喺上個月拍板，但要等待財會審批先能夠通過，而呢個項目喺上月尾已放喺議程之中，但排得比較後而仲未討論。不過，最新嘅議程出爐後，財會只要處理埋追加二百億元予創新及科技基金、涉及逾七億元嘅擴展光纖網絡至偏遠地區鄉村資助計劃，同埋十億元嘅建造業創新及科技基金後，就可以審批公務員加薪喇。另外，八十七億元嘅電費加價紓緩補貼就排喺尾二，極具爭議嘅十七億元朗天價行人天橋就排最後，預料要留待暑假後先能夠審議喇！

財會主席陳健波就話有信心休會前可通過公務員加薪方案，因為之前嘅項目唔多，而且早前都有泛民議員向佢表達將呢個項目調前嘅意願。佢又估計，政府見到最近幾次會議嘅環境後，唔想再拖令公務員無辜受罪先作出調動喇！但佢都話公務員加薪方案後仲有多個項目，直言每個都重要，希望會議進度唔好太慢喎。

卓妮