中環出更：住鄉郊王桂壎求安心 滅蟲公司冇用照幫襯
踏入雨季，成日都要帶遮出街固然麻煩，但更麻煩嘅係雨水帶嚟嘅蚊蟲滋擾，特別係飛蟻，每次都一大群咁出現，認真令人頭痛呀！香港律師會前會長王桂壎就係受害者之一，佢話住喺新界鄉郊，屋企附近有蚊蟲飛蟻在所難免，好彩嘅係佢話今年飛蟻數目較往年少，之不過就算係咁都唔敢開窗，免得啲飛蟻有機可乘。唔通除咗唔開窗，就已經冇其他預防措拖？
其實王桂壎每季都會搵滅蟲公司上門滅蟲，已經幫襯咗好多年，但佢話覺得滅蟲公司冇乜用，收費貴之餘，嚟到只係識講解一大堆理論，之後喺屋企入面安裝好多嘢，都唔知係乜嚟，但為求心安，就算覺得冇乜用都一樣繼續幫襯，總覺得一唔幫襯就會有蚊蟲出沒咁話！不過，由於佢太太係加拿大人，所以每年呢個時間都會過去探吓親，嚟緊佢又準備飛過去，順便避一避啲蚊蟲喎。
梁青華見慣蜈蚣蛤蟆蛇
香港鐘表業總會前主席梁青華就仲誇張，直頭話佢住喺爬蟲館都唔過分！同樣住喺新界鄉郊地區嘅佢，話屋企已經安裝咗紗網防止蚊同飛蟻入屋，但仲有蛇、曱甴、蜈蚣、蛤蟆呢啲常客要處理。但佢已經住咗七、八年，早就習慣咗呢啲情況，加上仔女已長大成人，唔會好似細細個咁，一見到就驚到呱呱叫，仲話只要定期倒啲稀釋漂白水落各個渠口，就已經足夠預防o架喇！
香港中文大學前校長沈祖堯雖然都係住新界，但就比較貼近市區，加上住得高，所以冇乜遇到蚊蟲滋擾，即使雨季屋企依然會開窗，仲話通吓風唔使開冷氣可以環保啲添！不過佢話就算中大喺山上面，都因為乾爽而冇蚊蟲問題，至少佢做校長時冇乜收過學生投訴，只需定期滅吓蚊預防傳染病就得嘞！
卓妮