中國風水學有所謂「養魚擋煞」，其實特區政府管治吹水學都有類似概念，而為政府扮演呢條擋煞黑金魚嘅，被市民鬧到反艇嘅領展咪就係其中之一囉。
呢，立法會公屋及居屋商場、街市及停車場事宜小組委員會尋日舉行公聽會，領展不負眾望成為眾矢之的，畀班議員同團體代表鬧爆。有議員喪插領展「賺到盡」，將商場煎皮拆骨再借頭借路大幅加租，以陰招逼走傳統小店；有居民就埋怨小店摺完一間又一間，成條邨得番有機食品店，食個飯都要五十幾蚊好惡頂，叫政府快啲回購領展咁話。不過官老爺嘅回應就來來去去三幅被，呢頭話好明白領展問題擾民，嗰頭又話回購領展唔係選項喎。咁即係點？即係話明愛莫能助，你死你事咯！
即係咁，領展係咩機構，香港人好清楚。領展瘋狂加租影響居民生計，有調查顯示八成受訪市民感到不滿呢筆唔講，就講公屋車位月租貴過公屋單位，妹仔大過主人婆，一樣惹人側目。仲有喎，住得公屋嘅好多係公公婆婆，希望公屋加建升降機同埋起行人路上蓋工程，但因為領展手握業權阻頭阻勢而遲遲無得動工，長者被迫日日騰上騰落、乾煎暴曬，民怨唔大就奇咯。
雖然話在商言商，領展賺錢至上唔難理解，但大公司都要負起社會責任o架，點可以眼中只有錢，一味「賺到盡」？當中有冇違規同埋違法嘅事宜？官老爺話就話如果有違反公契地契嘅，可以轉介畀地政總署執法，講到好似為市民主持公道咁款，實則係大耍官腔推卸責任嘅咋，如果唔係，領展就唔會有恃無恐，飛擒大咬咁多年啦！
冤有頭，債有主，如果唔係政府當年將公屋居屋商場、停車場同街市出售，同時放棄監管，領展就唔會變成市民眼中嘅吸錢貔貅。之不過市民有市民鬧，政府睬你都傻，叫佢回購領展吖，佢就話市值太貴；叫佢負番起監管責任吖，佢就話奉行自由市場；叫佢起番多啲公屋商場等市民自行選擇吖，佢又話覓地困難，總之翹埋雙手，乜都唔做。
功夫茶思疑，港府咁照顧領展係有原因嘅，有領展存在一日，就可以幫政府擋吓煞，「好打得」林鄭最叻就係轉移視線。「空置稅」亦係咁，矛頭對準地產商囤積居奇，就將政府拓土無能推得一乾二淨，唔止成功轉移民怨，仲可令庫房有錢落袋添，問你服未？
都係嗰句喇，政府無能兼冇心冇肺冇靈魂，叫佢解決領展問題，佢就搵人同佢「共享民怨」，所以話，與其話領展係座「大山」，不如話係港府嘅民怨擋箭牌好過。