政情：海濱樂園冇互動 姚思榮嫌死板
旅遊業係香港其中一個經濟支柱，近年政府出盡辦法作宣傳推廣，其中獲政府資助嘅灣仔動漫海濱樂園，以「自拍Selfie」為主題展出三十個香港原創動漫角色雕塑。不過旅遊界立法會議員姚思榮尋日喺立法會資訊科技及廣播事務委員會批評，該景點唔太特別，令人感覺好死板喎。
倡設聊天機械人
動漫海濱樂園喺灣仔金紫荊廣場旁，係為咗串連該區有「玩具街」之稱的太原街、同區茂羅街嘅動漫基地，以及每年舉辦動漫節嘅會展。由於該地擺放多個雕塑，市民和遊客只能喺度同雕塑合照打卡。姚思榮認為政府應該做多啲嘢，令市民有更深刻印象。佢仲提出兩項建議，包括設立「聊天機械人」、增設QR Code，提供作者嘅作品和影片等資訊，讓參觀者能透過互動形式增加對香港動漫嘅了解。
商務及經濟發展局常任秘書長梁卓文聽罷，話好感謝姚嘅意見，希望未來除咗業界同專業人士參與外，亦可提高公眾人士參與程度。大家不妨睇吓政府幾時先至真正郁手做嘢。