政情：想見番腹肌 李曠怡勁減磅
男人到咗咁上下年紀，唔多唔少都有啲發福，不過如果肯做啲高強度運動，都唔係一定冇得減嘅！早排喺中環撞到東華三院前總理李曠怡，差啲唔認得佢啊！事關平時見佢着開西裝，今次全身運動裝束，更重要嘅係佢瘦咗成個圈。一問之下，原來佢最近開始玩Cross Training（混合健身訓練），玩咗一個月已經減咗十幾磅！不過佢仲未滿足，話想努力啲，見番啲腹肌咁話。
玩混合健身練體能
做運動都有好多選擇，點解要玩Cross Training？李曠怡話最初係佢細佬喺美國開始玩先，一玩就玩上癮，返嚟香港後仲自己開舖教人玩，李曠怡都因為咁而接觸到Cross Training，不過佢就唔係跟細佬學，而係另搵教練。依家一星期上兩堂，每堂都會做啲唔同運動，例如跑步、踩單車、舉啞鈴等強度高嘅運動。李曠怡笑笑口話，以前太多應酬食到肥晒，所以依家想健康啲，練番好啲體能囉！