政情：游蕙禎入獄找數前議助獲撤禁足令
青年新政游蕙禎及梁頌恆前年同議員助理衝擊立法會會議室，游梁最終被判非法集結罪成，其中游蕙禎已經坐完四個星期監，上月尾已獲釋。尋日立法會行政管理委員會就討論兩人嘅十三名前議員助理，被禁止進入立法會綜合大樓嘅命令，而且原則上同意撤銷。睇嚟係因為游蕙禎入獄「找數」，先令到一班議助重獲自由喎！
觸發今次討論嘅係游蕙禎前議助李宗澤，事關早前佢去咗議員郭家麒嘅立法會辦事處做實習，當日雖然順利進入立法會，但下晝就被通知係黑名單人士，要即時離開。大家先發現事隔一年半，禁令仍然生效。後來郭家麒去信行管會，要求跟進同交代，李宗澤都呻話自己前年只係執行職務，事後一齊搭（車立）離開就被列入黑名單。
建制都撐「要懲處都懲處咗」
尋日討論時，有泛民議員認為應解除禁令，因為市民有進入立會權利，可以出席公聽會表達意見，唔可以終身禠奪佢哋嘅權利，加上有關案件已經作出裁決，認為現時係合適時間撤銷咁話。建制派雖然唔係一致支持，但都有人同泛民睇法接近，認為要懲處嘅都已經懲處咗，而且犯滔天大罪都可以改過自新，所以都撐撤禁足令。
雖然十三名行管會成員中，只得四名泛民議員，但係最後仍然獲得大多數議員原則上同意撤銷，不過仍未生效，因為仲要查清楚案件係咪完全完結，要確保無手尾跟先可以解除禁令。日後有關人士若再衝擊立會，就有機會再被禁足。睇嚟游梁罪成被判入獄，同埋游蕙禎放棄上訴去服刑，係有力理據說服議員支持撤銷禁令，都算係為一班被禁足嘅議助做番件好事。
另外，行管會早前成立三人工作小組，研究推展立法會秘書處員工延長服務年期方案（延休方案），小組亦都喺會上作出匯報，而行管會都同意小組所協調嘅方案，主要係九十八名非專業及輔助人員職級嘅員工合乎資格，希望盡量照顧基層員工。呢個方案被形容為「中間落墨」，因為難以做到法理情兼顧，但就堅持五個原則，就係尊重員工意願、跟從政府政策、顧及立法會財政負擔、不影響整體員工晉升同埋喺框架內行使酌情權。