中環出更：不忘凍肉業歐陽雄萬貼錢都要做
好多人都認為做地產行業可以賺好多錢，不過，搵錢並非一切。三代都係做凍肉貿易嘅中華出入口商會（中出）副會長歐陽雄萬（Anthony）就話，佢已經跨行做地產十幾年，賺得仲多過賣凍肉，而且凍肉已經唔係佢主要嘅生意，不過佢仍然繼續做，笑稱貼錢都要繼續做，因為呢個係本業呀。
Anthony話，五十年代，香港嘅凍肉主要來自內地，不過風水輪流轉，八十年代起，香港入口嘅凍肉就賣番去內地，佢哋亦因此避開咗九七金融風暴後嘅經濟衰退。
但係凍肉生意真係愈嚟愈難做，形容係「蝕住嚟玩」，佢就以地產賺到嘅錢去補貼凍肉生意。佢又講起，女兒同女婿都係建築師，所以佢當年就轉做房地產，至於兒子依家喺公司幫手。
張學修盼仔仔返公司幫手
講開子女接班，會長張學修嘅兒子依家喺英國讀緊碩士，佢話好想個仔快啲返公司幫手。秘書長陳勁喺中山有發電廠，不過佢話仔女都冇興趣接班，阿仔之前喺內地開設食品廠，做咗十年，近年就轉喺香港做金融。佢睇得好開，話仔女鍾意做乜嘢主要都係睇佢哋嘅意願，冇得逼佢哋繼承嘅。
同場仲有中出副會長許華傑及副秘書長楊靜，書展就開鑼，中出今年會繼續資助學生買書。許華傑就講起中出同政府合作嘅一個資助青年創業計劃，部分參加者營運得唔錯，例如喺香港仔賣韓式蛋糕嗰間。佢話如果再有下一期計劃，可能要同政府商討設立離場機制，因為有啲參加者嘅計劃被投資者睇中，但又難以離場咁話喎。
卓妮