因乜事幹有請小鳳姐咁高興呀？之唔係壹淫媒旗下爛果報銷量跌到阿媽都唔認得囉。唔止銷量跌、廣告跌，仲連股價都係咁跌，以宣淫販賤起家、以反中亂港為己任嘅壹淫媒嗰頭近，梗係要「熱烈地彈琴熱烈地唱」喇！
呢嗱，睇番爛果報近排公布嘅實銷數字吖，長期徘徊喺九萬幾份嗰啲位置吊命，連十萬份都冇呀陰功。上個月端午節更加跌到得八萬幾份，簡直沒有最低，只有更低，如果話係屈原顯靈，對壹淫媒得閒無事老屈名人患絕症、砌洗頭水含致癌物嘅無良所為作出懲戒，一啲都唔出奇。
數字唔會講大話，截至今年三月底，壹淫媒年度虧損接近五億元，三個財政年度夾埋蝕咗差不多十二億元，證明讀者眼睛雪亮，早就對爛果報宣淫販賤、反中亂港嗰一套生厭。呢，最近為咗催谷銷量，竟然衰到喺頭版唔打格仔刊登被虐女童林林嘅留院正面相，公然侵犯私隱，喺小妹妹傷口灑鹽，簡直人神共憤。咁契弟嘅嘢都做得出，梗係犯眾憎喇，最弊係銷量谷極唔起，軟過軟皮蛇。睇怕爛果報銷量低處未算低，再少個零都仲得，遲早步《壹週刊》及其他刊物後塵，消失於堆填區咯。
所以話啫，多行不義必自斃。漢奸黎多年來立壞心腸，為外部勢力充當反中亂港代理人，利用壹淫媒煽風點火，搞風搞雨，仲出錢出力搞違法佔中，舊年更公然辱罵恐嚇東方記者，擺明禍港殃民，視法治如無物。好彩邪不能勝正，契弟大發港難財嘅如意算盤不但打唔響，爛果報銷量仲喺佔中之後插水式下跌，連廣告商都避之則吉，睇吓爛果報一日薄過一日，廣告寥寥無幾，隨時十隻手指數得晒，呢啲咪叫「有咁耐下流，有咁耐折墮」囉。
唔係講笑，廣告係一個風向標，一份報紙受唔受歡迎，讀者有冇消費力，睇吓有幾多廣告就知嘞，爛果報廣告買少見少，證明市場都唔BUY。不過又冇乜出奇嘅，事關連壹淫媒員工都睇死漢奸黎永無翻身之日，呢頭攞到壹淫媒配發畀員工嘅股份，嗰頭就即刻要錢唔要貨。梗係啦，過多兩日變埋仙股，咁就喊都無謂嘞。
好明顯，壹淫媒蝕到渣都冇得剩，神仙都難救，契弟以為出賣《壹週刊》可以苟延殘喘，點知賣仔不成仲畀人告番轉頭，都算抵死咯。家陣就算搞埋「假自僱、真裁員」呢啲陰招都止唔到血，簡直害人害物。
嗱，上帝要壹淫媒滅亡，必先要漢奸黎瘋狂，大家記得準備好蠟燭紙船，睇住漢奸黎點樣垂死掙扎，齊齊送佢最後一程啦。