係咪賣咗啲資產就乜都唔使理呢？房委會喺○五年將一百八十項停車場及零售設施分拆出售畀領匯（現稱領展），原來當時雙方簽訂嘅《買賣協議》中有「分攤比率契諾」規定，領展同其後買家須攤分二十三個居屋屋苑公用地方管理同維修費，由房委會負責執行。不過有屋苑喺不知情下，白白代領展畀多一千萬元維修費，房委會冇回應有冇監察領展遵守契諾。咁樣擺明係逃避責任喇，係咪要班業主上門追債，身兼房委會主席嘅運輸及房屋局局長陳帆先知驚呀？
