政情：羅致光充大廚 硬銷撤積金對沖
多名司局長呢期輪流喺互聯網上載短片，回顧過去及展望將來嘅工作。勞工及福利局局長羅致光今次「包尾」，成為最後一位司局長上載周年回顧片，不過片中佢搞搞新意思，着住圍裙飾演大廚，夥拍副局長徐英偉一唱一和，介紹勞福局工作，可算係壓軸演出。
招牌菜「取消對沖炒飯」
政府一向被視為熱廚房，羅徐二人連拍片都走入「熱廚房」，上演《勞福廚房煲煲辣》。片中徐飾演傳菜員，同羅講啲客係咁催，大廚羅就話已經準備好高額長生津、優化職津等煲仔飯，其他菜式快就係要快，但係都要準備好同埋有品質，如果未做好就上菜，被彈回頭仲慢。
去到片中羅仲用炒大鑊飯嚟比喻商界極力反對嘅取消強積金對沖，話係呢屆嘅招牌菜，顧客或者會唔適應，底子薄嘅仲要加「幾錢補品」，需要好好製作咁話。