中環出更：嘉年華遇不測風雲 田北辰狼狽避雨
正所謂天有不測之風雲，夏天搞活動時晴時雨，都咪話唔頭痕！新家園協會尋日喺荃灣公園搞咗個少數族裔青年大使嘉許禮暨多元文化嘉年華，就遇上大雨要中途腰斬，平等機會委員會主席陳章明、立法會議員麥美娟（Alice）同田北辰等嘉賓急急避雨，都相當狼狽呀！
活動啱啱開始時，天氣仲好好，嘉賓睇表演、致詞及大合照都影埋，全程都好順利，不過田北辰喺大合照時突然指指個天，唔通佢未卜先知？到Alice頒獎畀青年大使前，突然天色昏暗，Alice相當醒目，叫定助理攞遮，喺佢頒獎期間就真係開始落雨啦。
活動腰斬 麥美娟唔捨得走
原本大會預備咗透明遮畀嘉賓，等嘉賓可以繼續坐喺前排欣賞節目，可惜人算不如天算，呢場雨愈落愈大，有遮都擋唔住，陳章明同田北辰等人急急忙忙跑到簷篷底下，同啲觀眾逼埋一齊避雨。後來大會同嘉賓商量後，考慮到現場露天擺放咗好多電器，如果喺大雨下繼續舉辦活動，擔心會有危險，無奈腰斬。
陳章明臨離開前原本仲想還番把遮畀大會，但咁大雨，大會就話唔使啦，叫陳章明下次出席活動先還喎！睇嚟陳章明下次好難拒絕再受邀做嘉賓嘞，事關要還遮吖嘛！
雖然活動腰斬，Alice仍喺現場留多一陣，同識咗廿幾年嘅街坊傾吓計。Alice話以往搞活動都不時遇到落雨，試過遊行時遇上大雨，但係唔方便擔遮，結果唔止個妝溶咗，頭髮又亂晒喎！既然咁貪靚，下次都係擔遮好啲。
卓妮