香港話就話係安全城市，其實得個名嘅咋，家陣連搭巴士都唔安全，隨時屁股開花。講緊嘅之唔係九巴座椅刺針事件囉，尋日再有兩單，已經係八日之內第八單嘞，加埋四日內有十幾單鎅爛座椅報告，證明狂徒猖獗，香港危機四伏吖！
嗱，尋日一架開往荃灣站方向嘅九巴，駛到屯門公路轉車站時，有乘客發現上層座椅有三支縫衣針，好彩夠眼利至冇中招咋。至於同日稍早時間，葵芳站巴士總站內一架準備開往安蔭邨嘅九巴，乘客上車後亦發現上層頭排座椅被人放置一支約八厘米長嘅針。連同之前幾單，幾乎都係來往荃灣一帶嘅九巴出事，仲試過有乘客中招見血添。「如坐針氈」過去就係形容詞，家陣喺香港就成為活生生嘅事實，問你點頂。
話時話，狂徒每次都向九巴落手，新巴城巴冇事，所作所為到底係針對九巴吖，定係報復社會，真係冇人講得埋。尤其係九巴早前鬧出慢駛罷工風波，勞資雙方是非不絕，家陣又出現「刺客」，恐怕唔會係巧合咁簡單。當然啦，香港生活壓力大，政治爭拗多，唔少人愈來愈偏激，言行充滿仇恨，有人鑽牛角尖報復社會亦冇乜出奇。好似尋日咁，有青年持氣槍恫嚇銀行職員被捕，反映今日嘅香港無奇不有，真係乜都有可能發生o架。
講番刺針事件先喇，即使九巴已經報警，警方重案組已經接手調查，但狂徒依然冇有怕，頻頻出動犯案，擺明喪心病狂，視法治如無物。點講都好，香港假假哋都係法治之區，絕對不容狂徒胡作非為，拜託警方加多兩錢肉緊調查，咪要市民日日擔驚受怕喇。
諗起都搖頭，近年香港烏煙瘴氣，亂象叢生，莫講話巴士座椅被人放針，搭𨋢隨時出意外，淨係大型基建搞到甩漏百出都夠晒匪夷所思。仲未計南亞兵團呢一筆，相關罪案年年增加，開支年年上升，但港府依然假仁假義，中門大開，搞到香港雞犬不寧，怨聲載道。仲有喎，新空管系統又出事，日前一架由台北返港嘅國泰客機，臨着陸至發現有飛機未駛離跑道，差少少就炒埋一碟，諗起都牙煙。至於「斤變両」劏客黑店、網上情緣騙案、電話騙案更係無日無之，怎一個亂字了得！
都話香港進入多事之秋，幾意想不到嘅事都會發生，警方一味懶懶閒，掉以輕心，遲早爆大鑊都似。唔係靠嚇o架，家陣就話放刺針啫，最怕呢股歪風好似傳染病咁，其他人有樣學樣，甚至搞到放炸彈，咁就一鑊熟嘞，唔該當局快啲破案喇！