政情：「羅冠聰」畀人掟落海撈垃圾
救命呀！有人跌咗落海呀！唔係呀，係羅冠聰畀人掟咗落海呀！唔係講笑o架！香港眾志前主席、現任常委羅冠聰確實畀人掟咗落海，但唔係佢本人，只係有佢頭像嘅橫額啫！咁係咪惡意先？又唔係喎，係善意嘅。
廢棄橫額循環再用
話說羅冠聰日前喺Facebook上載咗張相，仲貼文話自己跌咗落海，又話「過去幾個鐘入面，已經有幾位街坊同我講話見到我個樣喺黃竹坑條渠道上面出現……」仲叫大家唔使驚，其實係佢一堆已經無用嘅Banner畀地區朋友拎咗嚟循環再用，變成咗一塊「撈廢網」，去撈渠道上嘅垃圾。
咁又係嘅，佢因為宣誓風波被取消立法會議員資格，呢啲橫額都已經唔可以再掛，最後都變咗垃圾，用得就唔好嘥喇！佢仲提番班街坊關注自己社區，唔好亂拋垃圾添！