政情：肥彭陰魂不散 夥羅哲斯老調重彈
香港末代港督彭定康（肥彭）陰魂不散，香港回歸都已經二十一年，仲不時回魂對香港事務指指點點。喺由英國保守黨人權委員會副主席羅哲斯領導嘅人權組織「香港監察」（Hong Kong Watch）一個活動上，肥彭就話有人認為香港嘅前途係唔關英國事，佢認為係匪夷所思，仲向羅哲斯「笠高帽」，話香港監察嘅成立就係展示出英國對香港情況嘅關注。唔通肥彭都知道，香港回歸咁耐，已經冇人再聽佢支笛，怕孤掌難鳴，所以要搵埋羅哲斯大合奏？
肥彭喺活動上話，《中英聯合聲明》嘅責任英國及中國仍然需要繼續承擔，聽到有人話香港嘅前途係唔關英國事，覺得匪夷所思，認為英國政府同議會都應該了解香港嘅情況，香港監察就係要確保呢樣嘢，所以有重要嘅角色喎。
噏三噏四 批評《公安條例》違人權
之前本土民主前線前發言人梁天琦因為前年農曆新年參與旺角暴動，被法庭裁定暴動罪等罪名成立，判監六年。肥彭就喺度噏三噏四，已經被各界鬧爆，中國外交部同港府都有批評佢，佢事後就自圓其說，話自己只係評論《公安條例》。喺今次活動中，佢又再老調重彈，仲話一九九七年香港恢復並行使《公安條例》，簡直就係違反國際人權公約及政治權利，佢只係批評條例毫無需要，並唔係批評司法機構。
佢又提到去年十月羅哲斯被拒入境香港一事，話事件違反《中英聯合聲明》同《基本法》，認為係可恥，仲話需要交代喎。而羅哲斯就呼籲大家一齊合作，去確保香港人嘅基本自由、法治及自治可以得到保障，制止侵蝕。
羅哲斯自己連香港境都入唔到，試問又可以為香港做到啲乜嘢呢？肥彭早已失去政治光環，佢同羅哲斯兩個都只係「自彈自唱」，睇怕都冇觀眾(口架)喇。唔想繼續獻醜，最好自己用膠布貼住把口喇！