一個大西瓜，切開做十份，六份分畀佢，四份分畀你。家陣再削你應得嗰份，變成七份畀佢，只得三份畀你，被人咁蝦法都得呀？嗱，香港嘅房屋問題就好似呢個西瓜咁，無論公私營房屋比例點切點分，都係拆東牆補西牆，盞製造不公同埋社會矛盾嘅啫。
呢，特首林鄭月娥早幾日嗰套「三個目標、六項措施」呃Like房屋新政策，入面話將九幅私營房屋用地改做公營房屋用地，有身兼房委會委員嘅建制派立法會議員睇完，即時心有靈犀一點通，建議政府增加公營房屋供應，將依家嘅公私營房屋土地比例由六四改為七三，仲叫林鄭喺嚟緊下一份施政報告落實呢項措施喎。
即係咁，多啲興建公營房屋，幫基層市民上樓，相信冇人會反對，但最關鍵仲係要多拓土，否則，攞私樓用地嚟起公營房屋，表面上懶係為班最基層市民着想，實則係搵中產無殼蝸牛笨，直頭挑動基層鬥中產，製造社會分化。
大家有眼見，輪公屋嘅固然大排長龍，盼上樓嘅亦盼到變長頸鹿，特別係嗰班冇資格輪公屋嘅所謂中產人士就最痛苦，事關私樓價連升二十六個月，日日都係破頂嘅消息，要唔食唔飲二十年至有機會買得起一個豆腐膶咁細嘅單位，若果進一步減少興建私樓用地，即係令私樓供應減少，到時樓價飆到上月球都似，中產「上車」更加無望。
一句講晒，解決房屋問題嘅唯一辦法就係增加土地供應，而唔係喺點分點切方面做埋晒啲門面工夫。可惜吖，林鄭只係得把口「好打得」，拓土束手無策，淨係識得做騷，成立乜嘢土地發展專責小組，搞乜鬼「土地大辯論」。其實係人都知，香港係多元社會，人多口雜，見仁見智，無論係填海造地定係發展新界棕地，抑或打粉嶺高球場主意，又或者利用部分郊野公園邊陲地，瓣瓣都有人反對o架喇，邊有可能達成共識o架，拖得兩拖，五年任期屆滿，過咗海就係神仙，到時房屋問題呢堆蘇州屎就留畀下一任慢慢歎。
正如有人話齋，喺房屋政策上，林鄭睇怕連前特首梁振英都不如，梁特首雖然建屋無能，起碼都推出連串辣招，展示政府有做嘢，有抑制樓價嘅決心，反觀林鄭嘅所謂「管治新思維」就係乜都唔做，一味推卸責任，被人鬧得兩鬧就推出「三個目標、六項措施」虛晃一槍，連佢自己都話對壓抑樓市正面作用唔大，咁仲推出來把鬼咩。
都係嗰句喇，唔將土地呢個餅做大做闊，房屋問題唔使望會有解決嘅一日。港府一屆不如一屆，特首一蟹不如一蟹，真係哀莫大於心死！