中環出更：葉鍾佩雲杜拜遊唔見行李焗買夠7日衫
香港國際機場係全球最繁忙嘅機場，效率亦唔差，但最近因負責處理行李嘅地勤公司人手不足，導致不時出現行李延誤嘅情況。卓妮同唔少名人傾開呢個話題，好彩大家都冇遇上行李大塞車，但係行李唔見影嘅遭遇就幾普遍。善德基金會永遠名譽會長葉鍾佩雲就試過去杜拜玩，落機後行李唔知去咗邊，焗住即刻去買衫，仲一口氣買夠七日着嘅衫添，認真大件事。
葉太笑笑口話，由於當時會喺杜拜玩一個星期，又唔知行李幾時先搵番，所以就一次過買夠七日衫，連底衫褲都買足七套。好彩杜拜購物環境都唔錯，好快就搞掂，只係打亂咗首日行程，結果行李第二日就搵到。佢老公葉俊亨就試過喺英國返港時唔見咗行李，因為行程已結束，影響唔大。
鄧宣宏雁唔驚遇行李塞車
保良局總理鄧宣宏雁（Emily）都有類似經歷，話有一次喺歐洲返香港，拖運咗幾件行李，其中一件唔知去咗邊，結果幾日後先送返嚟。佢笑稱，香港機場處理行李嘅效率一向都唔錯，唔驚會遇上行李大塞車。Emily老公鄧鉅明就話機場當局已知出現問題，另聘承辦商按件計酬協助處理，咁做係「知恥近乎勇」，值得讚賞。
香港中華廠商聯合會副會長史立德就話，行李延誤呢啲事唔應該喺香港發生，事件反映香港嘅勞工不足，後生仔唔肯入行做粗重工作。好似佢開印刷廠，下一代都冇乜興趣做。遲啲佢會同業界好友去緬甸搵商機，但就唔會繼續做廠嘞！
卓妮