中環出更：戴德豐笑容帶好運 親切酒窩記一功
近年有機構做全球微笑指數調查，香港經常排包尾，唔通香港人真係笑唔出？有「零食大王」稱號嘅香港友好協進會（協進會）前會長戴德豐（Stephen）就冇呢個困擾，事關佢天生有兩個酒窩，「個樣係好笑嘅」，所以畀人感覺親切啲，自然就容易交朋友。佢仲叫大家笑多啲，話可以帶來健康同運氣喎。
早前協進會舉行成立廿九周年暨董事會就職典禮，做咗五年會長嘅Stephen終於卸下重任，難怪神情一派輕鬆。佢回顧任內點滴時話，協進會嘅會員都係社會精英，成個班子都好團結。講講吓，佢突然話可能因為自己有兩個酒窩，成日笑，所以大家合作得好開心。
「美容教母」鄭明明精力充沛
協進會司庫黃英豪聽完「酒窩論」都哈哈大笑，仲讚Stephen唔單止有酒窩有着數，仲好靚仔添！
加入協進會廿幾年嘅「美容教母」鄭明明都一早入場，佢幾時都咁精力充沛，連後生仔女都唔夠佢精神。明明姐笑笑口話，因為自己真係好鍾意做美容，最近仲親自調配咗一款化妝品，一萬套好快就畀學生搶晒。佢笑言個女都成日都叫佢退休，不過若果真係唔返工，自己可能會病喎。
協進會董事朱鼎健、李大壯及李國棟都喺度。李大壯帶埋喺外國讀書嘅兒子Edward一齊現身。Edward遺傳到爸爸嘅高大身形，不過就苗條好多，見佢哋同李國棟十分老友，唔通真係同姓三分親？
卓妮