成日話錢解決到嘅問題就唔係問題，其實凡事都有例外，好似港府咁，肥到襪都着唔落，弊在官老爺夠晒大花筒，大拿拿花十七億元公帑起條地區行人天橋，結果贏唔到掌聲不特止，反而搞到滿城風雨，真係唔得佢哋死！
講起呢條連接西鐵朗屏站至元朗教育路、全長五百四十米嘅天價天橋，真係一匹布咁長。早喺前特首曾蔭權時期已經提出興建，點知研究復研究，諮詢復諮詢，拖咗超過十年至公布方案，而造價亦由原本二億元大幅飆升至十七億元，當年起汀九橋都係差唔多呢個價，消息一出，唔使問阿貴自然全城鬧爆。喺民情洶湧下，政府決定臨時將相關撥款申請，從原定今個星期五、六嘅立法會財務委員會議程中抽起。
署理行政長官張建宗講就講得好聽，話咁做係為咗調節時間，做好同各界嘅溝通工作，但咪話功夫茶玩踢爆，官老爺從善如流係假，計過度過未必夠票，知衰知驚至係真。反對派政棍為反對而反對，為阻撓而阻撓，就話唔會同政府客氣啫，部分建制派議員都覺得政府幫唔落，咁又點解釋吖？特別係同屬建制派嘅建築、測量、都市規劃及園境界議員都表明反對，更加證明十七億公帑真係衰過掟落鹹水海。
冇錯嘞，普通一條地區天橋，就算當你鑲埋鑽石，都唔使十幾億喇，之前五大專業學會提出過反建議，同一條天橋，埋單落樓只係盛惠九億元，幾乎平一個Doub，唔怪得元朗居民雖然表面受惠，但都唔係一面倒支持，有地區人士就埋怨政府擺佢哋上枱，令元朗人承受「大嘥鬼」嘅罵名。仲有吖，政府被踢爆原來計漏數，居然唔記得同一位置嘅明渠活化工程，會因為天橋動工而受到阻延，街坊要繼續忍受臭氣熏天，唔嬲就有鬼。早知今日，何必當初，官老爺如果一早好似肥張所講咁「做好同各界溝通」，就唔使搞成今日咁喇！
講開又講，天價地區工程近年嚟遍地開花，市民早已見怪不怪。好似西九文化區一條唔夠七米長嘅接駁天橋，耗資三點五億元，計番每米造價仲貴過元朗天價橋，至於各區修建小型足球場、修葺花園一類蚊型工程，郁吓都講緊過億元，政府識印銀紙都唔掂。先唔講中間過程係咪有人過河濕腳，就算自己屋企買張梳化都貨比三家啦，官老爺講到尾都係冇心冇肺，根本冇當阿公嘅錢係錢。
港產官僚就係咁嘅嘞，大事做唔到，小事做唔好。港鐵沙中線、高鐵香港段等大型基建固然問題多多，地區工程一樣搞到一鑊泡。講到物非所值，廢柴高官坐享超過美國總統嘅待遇，衰過元朗天價橋多多聲！