政情：法案委員走清光 主席一個人開會
立法會嘅法案委員會不時都面對好少議員開會嘅尷尬情況，好似《2018年稅務（修訂）（第5號）條例草案》委員會尋日下晝開會，討論包括容許夫婦各自選擇個人入息課稅等預算案建議嘅稅務優惠措施，一度只有主席梁繼昌（Kenneth）一個人，終於等到有一個議員入嚟開會時，政府官員好似抓住一根稻草咁，作揖並呼叫「靠晒你啦」！
有議員折返如抓救命草
呢個法案委員會只有七名委員，開會唔齊人，連選主席時都冇爭議，Kenneth獲提名做主席後，建制派黃定光都搶住和議，之後議員走下一個，走下又一個，得番一個議員多次問問題，連呢位議員都走埋後，Kenneth一人力挽狂瀾咁問，到需要逐條審議時，終於忍唔住暫停會議，叫秘書處搵人返嚟。
一早已問咗問題嘅郭偉強第一個返嚟，財經事務及庫務局副秘書長黎志華即刻話「靠晒你啦郭議員，需要一位議員幫手逐條審議」，郭反問「爭啲咩呢？」到教育界葉建源入嚟時，郭就同葉講「叫人逐條審議喎，主席堅持呀！」二人距離主席個位比較遠，唔知Kenneth聽唔聽到，佢只係話「唔該晒」。郭之後黑晒面，逗留約十分鐘後就離開。